Kan iyo Bundo Kanduang, mandanga kato Manti Tuo, batitah maso itu, “Mano kau upiak Bandahari, sarato si Kambang Bungo, cukuik jo si Kambang Nan Batujuah, usah kalian balalai juo, sugiro mamakai malah kalian, kito ka pai ka Padang Gantiang, handak batamu jo Puti Bungsu, baru datang ka Padang Gantiang, datang nan dari Ulak Sikalawi. Mano buyuang kaduonyo, mangapo kalian balalai juo, sarupo urang indak acuah, tamui si Upiak Puti Bungsu, sarato Basa Ampek Balai, dalam Nagari Padang Gantiang,” kato titahnyo Bundo Kanduang, kapado si buyuang nan baduo.
Sanan manjawab Dang Tuanku, “Ampun denai Bundo Kanduang, Bundo banyak baanak buah, jikok jauah bakaum bakaluarga, lah patuik Bundo pai ka kian, iyo ka Ranah Padang Gantiang.
Lorong kapado badan denai, badan tasisiah surang sajo, tagua indak sapo pun indak, baa pulo denai ka pai, iyo juo bak pituah Bundo, bondong urang bondong awak, urang ka hilia awak kahilia, urang galak awak galak, nan digalakkan urang awak juo, bak langau di ikua kabau, Bundo juo nan ka malu”
Mandanga kato anaknyo, mambangih Bundo Kanduang, “Usah Buyuang baibo hati, bicaro usah nan bak itu, lorong kapado kieh jo bandiang, bundo lah lamo makan nasi, kilek camin iyo ka muko, kilek baliuang iyo ka kaki, Bundo di baliak itu pulo.
Lorong kapado Bundo Kanduang, urang arif bijaksano, takilek ikan dalam ayia, lah tantu jantan batinonyo, lah patuik Buyuang takuik ka sinan, Putri Bungsu bangso garudo, takuik digungguang dibaok tabang, inyo biaso mamakan urang.”
Mandanga Bundo Kanduang bangih berang, tunduak tadiam Dang Tuanku, sapatah indak inyo bakato, sanan batitah pulo Bundo Kanduang,
152
