Mairiang Pangulu Basa Batuah, sarato Dayang Ampek Puluah, kan iyo urang maliek, panuah sasak di Tanjuang Bungo, urang badiri di tapi labuah, hinggo ka Ranah Limo Kaum, indak nan putuihputuih urang, maliek Rajo nan lalu.
Babuni gandang talempong, salo manyalo ganto kudo, kudo Rang Basa patuik-patuik, mairiangkan Rajo di balakang, Rajo Daulat Bundo Kanduang, di mano kampuang dilalui, lah kalua urang nan banyak, gadang ketek tuo mudo, laki-laki jo parampuan, urang manyambah mambari hormat.
Dek lamo lambek di jalan, alah sarantang parjalanan, cukuik kaduo rantang panjang, tibo di pintu gerbang Padang Gantiang, babuni mariam tujuah latuih, alamat Bundo Kanduang alah datang.
Lah datang urang nan manjapuik, sagalo basa cadiak pandai, urang mulia patuik patuik, lah tibo di pintu gerbang ustano, ustano gadang Tuan Kadi, Suluah Bendang Koto Piliang, Rajo Ibadat Minangkabau, disambuik dangan bareh kunyik, sarato siriah di carano ameh.
Kalau diliek Ranah Talawi, tiok simpang bagabah-gabah, batirai bapucuak anau, labu-labu kasumbo sirah, babalango badaun pudiang, salo manyalo batang anjalai, pintu gadang ustano nantun, sabalik bapaga loran ustano, bagaluang tirai pucuak anau.
Lorong kapado dalam ustano, takanak tirai langik-langik, labia kain suto Cino, suto Cino bamacam ragi, urang di laman sangaik banyak, nak maliek rupo Bundo Kanduang.
Ado sabanta antaronyo, lah takambang kain jajahan, dari laman ka ustano, tampek lalu Bundo Kanduang, turunlah Bundo Kanduang di karando, karando usuangan puti-puti, bajalan naiak ka ustano, duduak di ateh palaminan tinggi, rapek papek dalam ustano, lah hadia sado nan patuik, sarato Basa nan Barampek, sanan batitah Datuak Bandaharo,
156
