sunsang, lubuak bapaga batu gadang, salo manyalo batu ketek, ateh bapaga pudiang ameh, salo manyalo bungo rayo, di hilia buayo Putiah Daguak, di tangah-tangah si Rangkak Hitam.
Kan iyo Bundo Kanduang, diluluih pakaian nan dibadan,takanak sakali kain basahan, kain basahan cindai haluih, tampak rupo putiah kuniang.
Mandi pulo si Kambang Bandahari, sarato si Kambang Bungo,si Kambang Manih jo si Kambang Kuniang, samo tajun dalam ayia,buni ka cimpuang marewan hati, adang-adang tadanga randah,adang-adang tadanga tinggi, runtuah pikiran mandangakan, mandi bakusuak jo balimau, sarato babadak jo bakasai.
Lah sudah mandi basiram, dikanakkan pakaian hanyo lai,bajalan babaliak pulang, si kambang mairiang di balakang, alah sarantang pajalanan, cukuik kaduo rantang panjang, alah tibo di laman, ditingkek janjang ditapiak bandua, satu tibo dalam ustano,nasi tahedang manantikan, dibukak cando tuduang saji, makanlah inyo Bundo Kanduang, Mangkuto Alam Minangkabau, Daulat Rajo Pagaruyuang.
Lah sudah minum jo makan, dikunyah siriah nan sakapua,sarinyo mambayang ka muko, kaleknyo tingga di rakuangan. Lamo sabanta antaronyo, takana mimpi tadi malam, urang tuo panjang jangguik, raso tampak di ruang mato, saroban putiah bajubah putiah,jangguik panjang sampai ka pusek.
Kan iyo di maso itu, hari lah pukua duobaleh, sadang tangah hari tapek, dihimbau Si Salamat Panjang Gombak, sarato jo Si Barakat,satu tibo inyo manyambah, “Ampun ambo Bundo Kanduang, jikok dibuang kami jauah, jikok dipancuang kami mati, apo parentah kami junjuang.”
Manitah Daulat Bundo Kanduang, “ Mano kalian nan baduo,ambiaklah buah batang kalapo, batang kalapo Nyiua Gadiang, ambiak buahnyo nan mudo, karambia sadang sudu-suduan, usah pulo nan mudo bana.”
6
