Mandanga kato nan bak kian, manyambah si Salamat jo
Barakat, “Ampun baribu kali ampun, lorong kapado titah Bundo,
denai junjuang di kapalo, denai pikua di bahu, tapi sungguah nan bak
kian, karano karambia sangaik sati, dijago dek ula dangan taduang,
kalo sipasan dangan lipan, manjago karambia nan kiramat, takuik
gantalah hati kami.”
Mandanga kato nan bak kian, manitah Daulat Bundo
Kanduang, “lriangkan malah denai ka laman,” lalu dikunyah siriah
sakapua, dibaco doa piganta, taruih disambua rumpun karambia,
takuik sagalo kalo jo sipasan, sarato ula nan pahuni, diangsua lari ka
puncaknyo.
Lorong kapado kalapo Nyiua Gadiang, karambia sati lagi
batuah, puncaknyo malepai awan, daunnyo manyapu tanah, bajago
kalo jo lipan, naniang basarang di dahannyo, nago basarang di
rumpunnyo.
Alah mamanjek si Salamat, hati nan samak-samak ragu, takuik
jo ganta si Salamat, dek untuang maso itu, tibo di rumpun tandan
karambia, diambiak karambia nan sabuah, dijatuahkan sakali ka tanah,
tibo di tanah tanah lambang, tibo di batu batu balah.
Turun sugiro si Salamat, diambiak karambia dek si Barakat,
balari naiak ka ustano, Bundo Kanduang mananti di ambang pintu,
galak tasanyum Bundo Kanduang, sanang pikiran maso itu.
Hari nan sadang tangah hari, sadang bunta bayang-bayang,
sadang linduang saliguri, dibalah kalapo dek si Kambang, iyo si
Kambang Bandahari, ditampuang ayia jo kumalo perak, ayia diminum
Bundo Kanduang, ayianyo harum manih taraso, salamak santan jo
tangguli, dimakan isinyo tapi santan.
8
