Maminum pulo si Kambang Bandahari, samo mamakan kaduonyo, sampureh dibuang ka laman, dimakan taduang jo sipasan, sarato ula jo kalo, mano nan makan jadi biso, sampureh tibo di daun jilatang, biso pulo batang jilatang, baitu kaba kato urang, kito nan utang mangabakan.
Kan iyo wakatu itu, sudah maminum ayia karambia, hamillah Bundo Kanduang, bak itu juo si Kambang Bandahari, sajak manganduang kaduonyo, disuruah cari susu harimau, sarato hati buayo, pangidaman Bundo Kanduang, payah rakyat mancarikan, ka dalam hutan rimbo rayo, tigo bulan lamo mancari, dapek idaman rang manganduang.
Cukuik bilangan sambilan bulan, sambilan bulan sapuluah hari, patang Salasa malam Rabaa, hari rancak bulan tarang, taraso sakik Bundo Kanduang, sakik pulo si Kambang Bandahari, sakik basalin ka baranak.
Tibo dukun nan pandai-pandai, panuah ustano nan gadang, bahimpun sagalo bini basa, bini Basa Ampek Balai, bajago-jago samalam nantun.
Badantuang patuih tungga, bakukuak ayam Kinantan, malanguah kabau si Binuang, maringkik kudo si Gumarang, babuni Salindik Jantan, lahialah anak Bundo Kanduang, bak itu juo anak si Kambang Bandahari, samo lahia samalam nantun.
Diliek anak laki-laki, laki-laki kaduonyo, tibo di lantai lantai tabuak, tibo di tanah tanah lambang, anak babaju kaduonyo, anak batuah jo kiramat, tidak dapek ditantang nyato, bak mamandang matohari, satu ado satu banamo, surang banamo Sutan Rumanduang, anak kanduang rajo kito, Mangkuto Ulak Tanjuang Bungo, tinggi nan tidak bapucuak, mamacik tampuak Minangkabau.Nan surang banamo Cindua Mato, anak kanduang si
Kambang Bandahari, urang kiramat kaduonyo, urang batuah hiduik-
10
