Galanggang
Datuak Bandaharo
Birawari Bundo Kanduang, sadang duduak di ustano, takana bana sakutiko lalu bakato maso itu, “ Manolah kau Kambang Bandahari, sarato si Kambang Bungo, pailah kau ka ateh anjuang, jagokan si Buyuang Sutan Rumanduang, sadang lalok dalam kulambu rumin, katokan suruah dari denai, denai mananti di surambi.”
Manjawab si Kambang Bandahari, disusun jari nan sapuluah, ditakuakkan lutuik nan duo, “Ampun denai Bundo Kanduang, jikok itu nan Bundo titahkan, susahlah denai malakukan, Dang Tuanku urang kiramat, jikok talinteh kaki lumpuah, jikok talangkah katulahan, kalau disabuik lidah kalu, kalau ditantang mato buto, denai juo manangguangkan, barek karajo tantang itu, baapo denai manjagokan.
Kalau nan lain dari itu, tibo di kapalo denai junjuang, tibo di bahu denai pikua,” kato sambahnyo si Kambang Bandahari, kaki tangan Bundo Kanduang, anak kunci ambun puro.
Mandanga sambah nan bak kian, bajalan sakali Bundo Kanduang, naiak ka anjuang anak kanduang, dijagokan si Buyuang Sutan Rumanduang, lalu batitah Bundo Kanduang,
“Manolah anak kanduang denai, balam tungga jajatan bundo,
14
