68
barambang patang usah kito lalai djuo naknjo sanang hati bapak naknjo tahu urang dikampuang bahaso kau hiduik kambali kaba-a pulo lah lai lah badjalan si Umbuik Mudo baduo djo puti Galang Banjak dek lamo lambek didjalan tibo injo dikampuang si Galang io dirumah Kampuang Aua amai si Galang sadang dirumah sadang bi-manuang2 dipintu nampak si Galang lalu malinteh gumirai darah didado bakato injo kalakinjo
O tuan bapak si Galang itan bak tjando si Galang itu bak roman anak kito lengonglah katangah djalan tjaliaklah katangah labuah mantjaliak bapak si Galang lah tampak pulo si Galang di patuik djo aka indak mungkin itu anaknjo bakato injo nan djadi binguang bana mah kau lah djaleh anak kito mati dimano kamungkin hiduik pulo pantjaliakan konan balain pandangan konan batuka urang banjak nan saroman
Badjalan djuo si Galang si Umbuik ba-uduang2 manampuah Kampuang Aua lah sabanta injo badjalan lapeh nan dari Kampuang Aua tibo di Kampuang Tibarau lalu naiak injo karumah alah sahari dua hari
Bakato si Umbuik Mudo o upiak puti Galang Banjak sarato djo puti Rambun Ameh baralek gadang lah kalian bantai kabau agak limo tumbangkan rangkiang tigo panggia niniak djo mamak gadang ketek tuo mudo baiak imam baiak chatib urang ranah Kampung Aua djo ranah Kampung Tibarau nak tahu urang kasamonjo bahaso si Galang baliak hiduik kaba a pulolah bai dibantai kabau limo ikua tumbangkan rangkiang tigo diguguah tabuah larangan
