sabab indak babini - adat mudo manangguang rindu - urang tuo manahan ragam - kato wazir Abd. Gafar. Mandanga kato Abd. Gafar - takana dirajo Puti Zaitun - maso dalam ustano - bapoya poya jo Abu Hasan rajo tahu hatinyo - bacinto Puti Zaitun kasayangan bini rajo. Bakato Harun Rasyid - manuruik ramal bintang - ado surang anak gadih - rancak bukan alang alang - gadih parawan anak itu - banamo si Upiak Puti Zaitun - tingga dalam rumah rajo - itu nan patuik jodo tuan - mandanga namo Zaitun mangaluah maharang Abu Hasan - tabayang rupo Puti Zaitun - bakato galak sanyum - bodoh bana kato tuan - hambo rakyat urang hino - indak patuik kajodonyo - babaua minyak jo ayia - dima kadapek campua baua - tasisiah juo dalam balango - bagai bunyi pantun urang
pisang ameh masak digoyang
dibao kataluak bayua
inyo ameh hambo loyang
dima kadapek campua baua
Manjawab tuanku rajo - kito iko umat Allah - indak ado tinggi randah asa jodoh mesti batamu - asam di darek ikan dilauik - batamu juo dalam balango - kalau untung indak ka mano - katonyo Harun Al Rasyid. Mandanga kato nan bakian - indak tarupo kato tuan - siponggok rindukan bulan - putiah mato mamandangi - macam-macam patuturan - sadang batutua galak galak - talengah Abu Hasan - dimasuakkan bius ubek tidua ka dalam cawan Abu Hasan - taminum ayia bius lunak sagalo pasandian - kuoknyo berapi api - talalok Abu Hasan - indak tahu dirinyo - kan iyo maso itu - dibawo ka ustano - dibukak sagalo pakaian -diganti pakaian rajo - tidua di biliak Harun Rasyid - dijago sagalo inang pangasuah hari samalam malam itu - lalok lamak Abu Hasan - tinggi hari tasintak - tajago dari tampek tidua - maliek suok kida - tampak gadih gadih - mangipeh ngipeh Abu Hasan - diliek pakaian barubah - bakato inyo maso itu - bakato kareh sua-
37
