PERKAWINAN MARAH JAMIN
Habih hari baganti hari - habih pakan baganti pakan - ado sabulan duo bulan - datang urang ka Marah Jamin - man'japuik kaminantu - urang Silaiang Padang Panjang – jando masinis si Bakar - banamo si Upiak Pakan - sabab banamo si Upiak Pakan - manuruik kaba kato urang si upiak lahia tangah pakan - dalam pakan Salasa - pakan Salasa Koto Baru - di sinan lahia siUpiak mande manjua nasi - dalam pakan Koto Baru - taraso sakik katiko itu - sakik kabaranak - kalari ka rumah urang - tibo di sinan anak lahia - dinamoi Siti Nursaya - garah garah urang kampuang bagalai si Upiak Pakan - sampai gadang tabao bao - sampai kini tarubah tidak - ringan manyabuak Upiak Pakan baitu kaba carito urang - laki jolong rang Bintungan - bacarai jo itu - balaki pulo lakinyo masinis kureta - tidak ado urang nan tahan - amainyo cipeh muluik - minantu elok katiko baru - urang dikieh jo dibandiang - indak tatahan muluik amai - bacarai urang laki bini - itu mudonyo Upiak Pakan - lah batigo lakinyo - manjawek warih mandenyo - mandenyo balaki banyak - salapan inyo balaki - alun layua siriah balaki pulo surang lai - kalau mancari usah disabuik - manggaleh nasi tiok hari - Kamis jo Ahad nan tidak Sinayan Jumaat di Padang Panjang - hari Salasa di Koto Baru - salamo manggaleh nasi - tatuka rumah nan usang - tabali sawah duo piriang – manggaleh sangat kayun - nasi murah samba lamak - takato randang kak Saya - tambusu lamak pulo - lorong kapado Marah Jamin - sabab lakeh babini - ibo maliek Rabiatun - batanak manjapuik ayia awak ketek tangan lunak.
Sudah kawin jo si Upiak di bao ka Bukik Tinggi - tingga basamo jo Rabiatun kan iyo Marah Jamin - awak baru samo baru - samo maajuak paratian - kasiah sayang jolong basintuah - ado sabulan duo bulan - tampak karenah Upiak Pakan - jauah balain jo si Sanah - babalanjo indak pandai - indak cukuik gaji laki - manjalang satangah bulan - habih pitih gaji - tapaso manggadai - tagadai kain jo baju - tiok bulan ka rumah ga-
71
