malam mangko lalok — tabayang rupo anak bujang — lintuah hati katikotu — lamo tidua mangko talalok — mato tapiciang mimpi tibo raso balayia dalam kapa — hari malam bulan tarang tagak baduo di ateh dek maliek liek ka lauik lapeh — kapa sadang bajalan — tampak cahayo tarang bulan — bulan panuah ampek baleh — basanda di dado Jamaran — sadang banyanyi marindu hati — tasintak sadang tidua — kironyo bamimpi barasian — galak sorang si Rabiatun — iyo juo pantun urang —
Taratak gunung pasaman
kurinci sikumbang duo
taragak usah bapasan
jo mimpi kito basuo
Olak olai bujang Jamaran — sadang duduak di palanta — hari nan sadang paneh pagi — duduak bamanuang manuang sorang — pangana kapado Rabiatun — raso katampak galak sanyum — balubang pipi dibawo galak — tampak kariciang jo liok mato suduik mato mambunuah.
Api api tabang ka dusun
dari dusun tabang ka banto
indak mati diracun
mati disuduik mato
Sadang duduak talena lena — dicubik urang dari balakang — matengok si Jamaran Rabiatun rangkai hati — bakato Siti Rabiatun — sabana rancak isi carito — carito dalam buku — iko buku dipulangkan — tarimo kasi banyak banyak — dibarikan buku ka Jamaran — buku carito buku roman — suko manggantuang mambunuah diri — katonyo Siti Rabiatun — baitu bana — cinto hati — usah cinto dipamainkan — manjawab si Jamaran — tando bodoh kaduonyo — mungkin badan ka dibunuah — dunia lapang tampek lari - katonyo bujang Jamaran — manjawab si—
78
