tangah taruih ka Batawi-jo kapa nantun ditompangkan-iyo buangan nan baranam. Kapa barangkek anyo lai-tingga Balawan jo kota Medan-kapa di jalan singgah singgahan-tiok nagari palabuhan-baranti kapa sakutiko. Dek lamo lambek balayia-jauah basarang dakek juo-lah tibo garan di sanan-palabuhan rami Tanjuang Pariuak diturunkan malah urang buangan-urang nan banyak turun pulo. Kan iyo buangan nan baranam-samo sabondong ka anamnyo-upeh mairiang di balakang-sampai-sampai ka sitasiun-naiak kureta pukua sabaleh. Barangkek pulo kureta api-maninggakan tasiun Tanjuang Pariuak-indak lamo antaronyo-sampailah garan kureta nantun-tasiun banamo tasiun kota-baranti reta anyo lai. Lah turun urang hukuman-urang hukuman nan baranam-bajalan bairiang-iriang-upch manjago di balakang-manuju tansi di Galodok. Dek lamo lambek di jalan-lah tibo malah di Galodok-di sinan tampat nan barampek-tamasuak Sutan Karangan-baduo takirim ka Cilacap-itu nan gadang kasalahan.
Kan iyo Sutan Karangan-lah bulek pikiran dalam hati- lah satu tekat jo pangana-iduik sabagai urang buangan-lamo iduik banyak dirasai-jauah bajalan banyak diliek. Lah sudah suratan sajak dahulu-sajak di rahim bundo kanduang-tansi Batawi ka diunyi-indak paralu disusahkan-iduik di tansi caro tansi. Indak lamo mauni tansi-dapek kawan Sutan Karangan-dapek saurang-urang Bantam-umua nan baru mudo matah-tagahlah tansi ka tunangan-dek mambunuah manoko tabuang-manggaduah bininyo tatangkok tangan, Kononlah urang Bantam nantun-urang siak pandai mangaji-tamat Kuraan tigo puluah jiuh-tiok ukatu inyo Sambayang sangaeklah taat baagamo. Saganlah urang satansinyo -taradok kapado anak mudo-ijan dicubo manggaduah-gaduah-kaki capek tangannyo capek-panahlah urang mancu boi-di sinan juo utang babayia-marasai pansan urang nantun.
Birawari Sutan Karangan-lah tibo garak dari Allah-alah takana di nan bana-sajak mandapek kawan nantun-sanan baraja Sutan Karangan-rukun syaratnyo pasumbayangan-sarato bacaan rukuak tagak-disimakkan bana elok-elok-didangakan bana hati-hati-sabuah indak dilupokan. Barakat rajin Sutan Karangan-kuek baguru rajin baraja-sado nan dapek diamakan juo-nak pan-
112
