Dek lamo lambek bajalan-lah laruik hari tangah malam- diiriangkan labuah nan panjang-tampak di muko padati kabau- padati kabau bairiang-iriang-adolah garan ampek buah. Kan iyo si bujang Mansun sanang saketek agak-agak-manampak padati kabau nantun-lalu dipacapek malah langkah-dituruikkan padati dari balakang-dijago jarak jannyo jauah. Kununlah urang tukang padati-bajalan malam lah biaso itu nan sanang pajalanan-malam batambah laruik juo-lah parak siang candonyo hari-lah tadanga ayam bakukuak-lah tibo malah di Kampuang Tangah. Tadanga pulo tabuah babunyi- lah abang urang di musajik-tadanga abang malanyuik-lanyuik-baranti padati kaampeknyo-baranti tantang lapau urang-dibukak kabau dari pasangan-dipawikkan dibari makan. Lah sudah padati talatak-tapawik kabau dibari makan- ka iyo tukang padati-masuak ka lapau kaampeknyo-niaik sangajo handak makan-karano paruik lah litak pulo.
Birawari si bujang Mansun-mancaliak mamak tukang pa- dati-lah masuak lapau kaampeknyo lalu si Mansun masuak pulo-paruik taraso sangaik litak-badarong bunyi galang-galang manunggu nasi tak basuo, Sato masuak inyo ka lapau-nasi nan alun lai masak-dimintak sajo katan sapiriang-sarato dangan goreng pisang-aianyo kopi paik sajo. Sambia duduak mananti kopi-duduak si bujang maunjua-unjua-karano badan panek-panek-kopi tibo katan taedang-lalu disantap anyo lai-sambia babaso ka tukang padati.
Kan iyo samaso itu-lah sudah katan disantap-katan jo goreng pisang rajo-katannyo angek gorengpun angek-nan baru masak kaduonyo-diraguak pulo kopi angek-angek nan ngilu- ngilu kuku-taubek raso lapa paruik-ta ilang raso latiah badan-tarangah duduak bujang Mansun. Sambia duduak inyo marokok-maisok rokok nan sabatang-sanan bakato tukang padati-salah surang nan agak tuo-manyapo si bujang Mansun,
"Mano rang mudo kato hambo-handak ka mano garan rang mudo-mangko lah tibo pagi bana,”-katonyo tukang padati-manyapo sambia galak sanyun.
Mandanga kato nan bak kian-sanan manyahuik bujang Mansun- sarato taratik jo sopannyo, "Manolah mamak kato
162
