hambo-kok itu konon mamak tanyokan-muka suik hambo nak ka Padang-pukua bara garan kuritapi tibo,”-katonyo si bujang Mansun-bakato sambia batanyo-sambia lalu ka urang lapau.
Sanan manjawab urang balapau, "Kok kuretapi nan Sutan tanyokan-kureta pagi di Padang Panjang-tibo di siko pukua salapan-agak lamo juo Sutan mananti,"-katonyo urang nan balapau. Disangko si Mansun urang panggaleh-lenggang leng- goknyo tak barubah-saketek indak nan mangasan-bahasa inyo dalam palarian-inyo nan tanang-tanang sajo-indak barubah paratian-tak ado urang salah sangko.
Laguah lagah bunyi kureta
sadang manjalang pandakian
Bujang Mansun duduak maota
di siko kaba dinantikan
IV. KARATAU MADANG DI HULU
Didulang sadulang lai
pandulang ameh Malako
Disambuang kaba nan tadi
samo mandanga malah kito.
Baiaklah kaba dipadareh eloklah kaba dipasingkek, salorong tantang bujang Mansun lah sampai inyo ka kota Padang mukasuik sangajo dalam hati-lah bulek niaik lah pakek tikaik handak maanjak-anjak langkah handak marantau ka tanah Jawo-bia marantau badan bak kini-pado malaraik tingga di kampuang.
Adapun si bujang Mansun--lah tibo inyo di Padang dijua malah ringgik ameh-ringgik ameh Angku Kapalo bukan makasuik ka mancilok-sangajo handak manyalang sajo isuak kok umua samo panjang-kok lai Tuhan bapamban diniatkan di dalam hati-handak mambayia ringgik nantun. Alah sudah ringgik tajua dibali pakaian sapatagak
163
