Mantimun bungkuak di dalam padi
cuko di dalam pabarasan
Sunggual baramuak di dalam hati
di muko haram kalihatan
Birawari gadih Dalipah-mancaliak si Mansun alah jago-sanan bakato hanyo lai. "Manolah Udo kato hambo-eloklah makan kini-kini-usah badingin nasi puto-lah sajak tadi hambo datang-Udo nan sadang lalok lamak,"-katonyo gadih Dalipah-tutua katonyo basumanih.
Mandanga kato nan bak kian-manjawab si Bujang Mansun, "Kalau baitu kato Adiak-mak hambo basuah malah muko-hambo kayaikan ka balakang,"-katonyo si Bujang Mansun-sambia tagak basulambek-mambasuah muko ka balakang.
Lah sudah inyo mambasuah muko-lalu dimakan malah nasi-nasi diantakan si Dalipah-walaupun makan alun taraguak-dek takuik Dalipah baibo hati-pambawoannyo tak dimakan-dikayaikan juo mamakannyo.
Kununlah makan urang sakik-saroman makan ka daguak- makan saketek alah kanyang-dikamehi malah dek Dalipah-sambia bakameh bakato juo. "Manolah Udo kato hambo-hambo caliak hambo pandangi-kutike Udo sadang lalok-Udo tagalak-galak surang-mimpi apo ko lah nan libo-rasian apo ko lah nan datang-kok buliah hambo nak tahu-curitokan malah bakeh hambo," katonyo gadih Dalipah.
Mandanga kato si Dalipah--tasanyun si Bujang Mansun- sanyun bak panch monganduang hujan-dikatokan awak kok malu -indak dikatokan ka baa pulo-bakato juo nan jadi, "Kalau itu nan Adiak tanyokan-mimpi hambo sabana rancak-malulah hambo mangatokan-takuik di Adiak bagalakkan," katonyo si Bujang Mansun-sambia mancaliak ka si Dalipah.
Maningkah pulo si Dalipah, "Kalau baitu kato Udo-manduo hati Udo ka hambo-bana lai picayo indak-kok rancak mimpi Udo nantun-usah rancak di Udo surang-handaknyo rancak di kito baduo," katonyo gadih Dalipah-bakato antah maranyuak-maranyuak antah maajuak-maajuak hati bujang Mansun.
194
