Ulak alainyo kato nantun-lah sampai hari limo baleh hari- kan iyo di bulan timbua-dinikahkan malah si Mansun-iyo jo gadih Dalipah-alek kawin nan sadang elok-langkok jo karik dangan barik-sarato kawan handai tolan-ramilah rumah Sutan Salim rami dialek badatangan. Baitu pulo pihak si Mansun-banyaklah kawan nan datang-baiak nan samo samo polisi-ataupun kawan di luaran-badacak juo rami alek-matapeh si Mansun babini-dibagi gala manuruik adat-ketek banamo Mansur-gadang bagala Sutan Mansun.
Sajak lah kawin Sutan Mansun-iyo jo Upiak Dalipah-barulah tatap paratian-rukun jo damai paragaulan-saiyo sajo patang pagi-nampak anak daro jo marapulai-bajalan-jalan baduo-duo. Ramilah kini rumah Sutan Mansur-urang surang alah baduo- ajuak maajuak paratian-samolah sanang kaduonyo.
Sulasiah di ujuang guguak
tampak nan dari parantian
Kasiah-sayang jolong basusuak
samo maninjau paratian
Sawah bapadi lah taganang
datangnyo ayia tak baranti
Di malah hati tak ka sanang
lah samo dapek nan di hati
Dendang duo dendang tigo
pacah pariuak parandangan
Bialah makan bialah tido
asa leh duduak bapandangan
Pacahlah cawan ditimpo cawan
ayia taganang diranangi
Babaua sopan samo sopan
sarupo santan jo tangguli
Kononlah pulo Sutan Salim-sanato dangan Siti Nuriah- sananglah hati suko pikiran-kok nan dimukasuik kini lah sampai-kok nam diama alah pacah.
199
