panjang-labuah nan panjang bakelok-kelok. Lapeh nan dari Padang Lua-manampuah simpang Sungai Tanang-manjalang kampuang Pakan Sinayan-mandaki ka Guguak Randah mandala di Koto Tuo. Dek kudo biaso manambang jaual-taruih bajalan ka Balingka-manjalang pandakian Sungai Landia-tampaklah puto kampuang Ranah-bendi mamurun tantang Panta. Lah tibo di lapau Panta-baranti bendi kaduonyo-kudo baranti balapeh panek di sinan kudo dibari makan-Sutan Mansur sarato jo bininyo masuak ka lapau istirahat-baitu pulo kusia bendi-malapehkan rangah garan namonyo.
Lah sudah baranti sakiro-kiro-lah lapeh malah panek badan-kudo pun alah kanyang pulo-ditaruihkan malah pajalanan-manuju kampuang Matua Hilia-kudo balari basigontai-sungguahpun gontai ka sampai juo.
Dek lamo lambek di jalan-jauah basarang dakek juo-kok dakek tibolah garan-lah sanjo hari di Matua Hilia-kudo baranti tantang halaman-tantang halaman rumah si Dalipah-babunyi lonceng mandareng-dareng-lonceng bendi kaduonyo. Sato tunin si Sutan Mansur-diimbau amai dari laman-takajuik mintuo ateh rumah-Sutan Salim turun dahulu-disonsong minantu nan alah tibo-dicaliak anak nan lah pulang-diambiak cucu nan ketek-dikipak dipangku sayang-lalu basalam jo minantu.
Kononlah Siti Nuriah-inyo nan baru salasai sambahyang-dibukak tilakuang bagageh turun-bagageh turun ka halaman-disapo minantu Sutan Mansur-laikoh garan salamaik sajo-sapo babaleh dangan sapo sambia karajo maangkek barang-pambawoan anak dari rantau-hati di dalam nan samo sanang-mancaliak anak jo minantu-sarato cucu si Rasid ketek-mambawok pambantu pulo surang.
Pado hari nan barisuaknyo-banyaklah urang naiak ka rumah-urang nan suok kida rumah-manantui dagang pulang marantau-mancaliak Dalipah jo anaknyo-sarato dangan suaminyo-Dali-pah nan gadih dari kampuang-kini ko pulang lah basuami-malah pun alah baranak pulo. Ado pulo nan datang mancaliak-mancaliak pambawoan urang rantau-kok lai banyak ameh perak-baringgik ameh rupiah ameh-subang ameh bagalang pulo-kok lai taba-
209
