hambo caliak Mamak batambah mudo-apokoh garan kaba kampuang,” ―katonyo si Sutan Mansur. Sanan manjawab Mamak Pono,” Baa juo hambo ka mudo―uban lah tumbuah di kapalo―kok kunun kaha kampuang awak―Datuak. Muntiko alah baranti—baranti jadi Angku Kapalo—baranti buruak jatuah tapai―ulah mamakan pitih nagari―kini baganti jo Datuak. Gampo Alam―niniak mamak leh alim pulo—pandai mamarentah di dalam kampuang—sananglah hati urang banyak,"―katonyo mamak kusia bendi―curito tantang kampuang halaman―kudo dilacuik lambek-lambek manuju arah kampuang Dalimo.
Sadang mandanga curito juo―curito tantang kampuang halaman—banyaklah ota sano sini―bajawab sagalo tanyo―curito kampuang dapek sadonye. Dek lamo lambek nan bak kian―lah sampai bendi ka kampuang—kampuang Dalimo kampuang halaman―sato tibo bendi baranti―turunlah konon Sutan Mansur―taruih sakali ka rumah adiak―nan banamo si Upiak Boneh.
Baru tibo inyo di halaman―baimbau inye maso nantun—imbau tak kunjuang basahuti―naiak si Sutan ka ateh rumah―di ateh cumah urang tak ado―taruih sakali masuak dapua―didapati adiak si Upiak Boneh―sadang makan duduak di dapua―makan jo uwok pucuak parancih―sambanyo samba lado mudo—lah runciang tunjuak dek mamalik―baju di badan lah rateh-rateh―di bahu batamba pulo―ibolah hati Sutan Mansur—jatuah ka dalam aja mato―mancaliak parasaian adiak kanduang. Dilayangkan mato suok kida―banyaklah sumpik sudah mangayam—ikolah jinih untuang adiak―iduik mangayam siang malam—lah laruik malam mangko lalok.
Mandi ka lubuak baralian
udang di sangko tali-tali
Dek mabuak untuang jo bagian
malam disangko pagi hari
Angku Damang Datuak nan Rambai
api-api duo sabenggo
Cubolah tenggang di nan pandai
hati jo jantuang nan basangketo.
212
