Mancaliak tuan baru tibo―talonjak si Upiak Boneh―dikambang sumpik tampek duduak―duduak si Sutan di atehnyo. Dilatakkan pulo tabuang kawa―tabuang basumbek dangan ijuak—kopi daun itu namonyo―talatak pulo galuak tampuruang―galuak bakikih aluih-aluih―lah hitam cando ka lamonya. Dituangkan aia dek si Sutan—kopi daun ka dalam galuak―kopi angek ngilu-ngilu kuku―barasok-asok dek angeknyo―lah lamo indak basuo―aia kopi daun nan bak kian―lalu diminun dek Sutan Mansur―Allahu Rabbi raso kopi―takana hiduik mandeh kanduang—taro ketek pai jo mandeh―mamiliah daun daun kopi―lalu dicucuak dangan bilah―disangai-sangai di salaian―lah masiak mangko di rameh-dirameh sakadar ka tapakai.
Dek sangaik taragak jo tuan kanduang―lah kanyang sajo si Upiak Boneh―dikamehi nasi jo samba―diambiak pulo ubi baabuih―disanduak ka ateh piriang―ditatiangkan pula ka tuan kanduang―hati nan gadang sandirinyo―mirih aia mato kagirangan.
Alah talatak ubi baabuih—disuruah tuan mamakannyo―sambia bakato hanyo lai,” Tuan denai janyo hambo―makanlah dulu ubi nantun―samantaro denai mancari bareh―baiko tuan
makan nasi,"―katonye si Upiak Boneh. Mandanga kato nan bak kian―manjawab si Sutan Mansur,” Usah adiak bapayah-payah—duduaklah dulu adiak kanduang—tuan nan balun litak bana—baiko kito pai ka pasa―ka pasa ka Bukiktinggi,”―katonyo si Sutan Mansur―bakato bahibo hati―mancaliak untuang parasaian—parasaian adiak kanduang diri―sajak paningga mandeh kanduang―awak pun indak maacuahkan. Laiu dimakanlah ubi baabuih―si Upiak Boneh pun duduak pulo—banyaklah tanyo Sutan Mansur—lalu dijawab dek si Upiak―dicuritokan sagalo parasaian—sajak paningga kakak kanduang. Konon paningga Sutan Mansur-hiduik nan alun ka barubah—tingga jo etek pagi patang—etek nan rintang bakarajo―ka sawah ka ladang pagi patang—indak ado bara di rumah―si Upiak sajo mahuni rameh. Tapi samantang pun baitu―alhamadulillah Tuhan nan kayo―kok badan lah indak sakik-sakik—musiki karajo tiok hari―makan pun kadang bakurang-kurang―mahunyi rumah sambia mangayam-mangayam sumpik siang
213
