piang dapek kapandaian―nasib tajajah dikana juo. Kini lah iko jinih pengkaik―alah manjadi urang gadang―Tuhan lah lai bapambari―kasanangan dunia lah dapek pulo―tapi kok iduik sadang tajajah―digalakkan juo dek Ulando. Sajak timbuanyo pikiran nantun―mulai mandakok ka rang banyak―masuak paragaulan urang awak―masuak parkumpulan urang dagang―urang Padang nan di Batawi―mancari baso jo basi―indak mambangga jo tinggi pangkek―samo-samo manyenseng langan―untuak kapantingan parakumpulan. Nyato parkumpulan urang dagang―caro sosial nan ditampuah―kok nyampang ado kamatian―diimbaukan urang ka rumahnyo―indak ado bapiliah bulu―bia rang bansaik bia rang kayo―Sutan Mansur datang manjanguak―malah nyo sato mauruihkan―mauruih tanah pakuburan-mauruih alat kamatian—sampai janazah dikubuakan—salasai baru dihantikan. Kok nyampang ado nan kasampitan―umpamo tak lanteh angan di rantau―dek sakik iduik jaman malese―sampailah bansaik di rantau urang―ka pulang pitih tak ado―ka ditahan iduik kok seso—Sutan Mansur sugiro turut tangan―sarato parantau nan patuik-patuik―baiyua basamo-samo―mangumpuan bantuan nan paralu mancarikan ongkoih urang nantun―untuak dipulangkan ka kampuangnyo. Atau kok ado urang panggaleh―manggaleh ketek mancari makan―nan sadang ditimpo kasusahan―pokok kok abih dek tamakan―atau kok galeh jatuah rugi―Sutan Mansur sato mambicarokan—mancarikan jalan kalua―basamo jo urang nan barado—maminjami pokok urang nantun―malalui parakumpulan nan ado―dibuek paraturan langkok-langkok―tabaia utang jo ansurun—baitu eloknyo ado kasatuan.
Dek lamo lambek nan bak kian―sayanglah urang ka Sutan Mansur―musahua namo di urang awak―urang bapangkaik nan randah hati―amuah sahilia jo samudiak―amuah mambantu rang nan susah—suko bagaua jo rang banyak―hilang curiga salamo ko-curiga urang ka bakehnyo―sagan mandakek ka Sutan Mansur―Ajung Jaksa amtenar Ulando―kaki tangan pamarentah panjajahan―raso ka sabi ka Ulando—labiah Ulando dari Ulando. Kini ko urang lah mancaliak maliyek jo mato kapalo sandiri―namun Sutan Mansur lain sipatnyo―balain pado pagawai nan banyak―
217
