I. URANG BADUO BADUNSANAK
Gunuang Marapi jo Singgalang
sumarak koto jo nagari
Dangan bismillah kaba dikarang
mangabakan tambo urang nyok ari
Pariangan nagari asa
tasabuik di dalam tambo
tambo disimpan rajo-rajo
Mamintak maaf hambo bakaba
Turangguang Putiah namo kabanyo
niniak muyang urang IV Koto
Rajo banamo Rajo Kinayan
anak dek Reno Sari Dunia
di VII Koto Pariaman
Kaba nan lamo kami kabakan
kalau tadapek salah jo jangga
tolong dek Tuan mambatuakan
Barmulo di hari nan dahulu—di dalam alam Minangkabau—dalam daerah Luhak Agam—koto banamo VI Koto—di nagari Canduang Koto Laweh Pandai Sikek—tasabuik Datuak Tumangguang putiah panghulu di kampuang Koto—panghulu nan gadang basa batuah. Adapun baliau nantun—katurunan nan dari Pariangan—nagari asa sajak saisuak—tatkalo maso dahulu—niniak muyang urang Malayu bakeh bahimpun jo bakumpua—sabalun bapindah-pindah tampat—nan sakuliliang gunuang Marapi.
Birawari baliau nantun—pihak di anak kamanakan—ka pai bakeh batanyo—ka pulang bakeh babarito—urang cadiak candokio—lagi jauhari bijaksano—bak ibarat baringin tumbuah di tangah padang—ureknyo paguah ka bumi—pucuak malembai ka udaro—urek nan tampek baselo—batang nan tampek basanda—daun rindang bakeh balinduang—bakeh balinduang kapanasan—bakeh bata-
27
