Tatkalo di maso itu—nan bapulai nan bamunggu—nan basasok bajarami—baliau baduo badunsanak—iyo nan bagai anak balam—sikua jantan sikua batino—nan laki-laki Mangkutak Mangkuto Alam—bagala Datuak Tumangguang Putiah—nan padusi si Ganti Murin—anak gadih nan jolong gadang.
Kononlah si Ganti Murin—elok rupo bukan kapalang—tinggi tidak randah pun bukan—sadarhano samporono bisai—muko nan bagai bulan panuah—pipinyo pauah dilayang—kaniangnyo kiliran taji—abuak batikan indak jadi. Panjang abuak samundam panuah—bibianyo asam sauleh—lidahnyo ampalam masak—gigi bakilek gewang kaco—lihianyo janjang bahunyo leha—pinggang rampiang dadonyo bidang—langannyo ataran anyuik—batihnyo bak paruik padi—bunyi tutua nan lamak manih—mancameh anak mudo-mudo.
Pihak kapado parangainyo—budi baiak paham katuju—elok baso bukan kapalang—anak batunjuak baajai—pandai manakat manarawang—atau manyulam jo mangayam. Anak gadih elok taratik—haromat kapado nan tuo-tuo—indak panah bajalan surang—walaupun mandi ka tapian—tatap inyo ado bakawan—kalau ado nan ka dituruik—inyo salalu mintak ijin—ka bakeh nan tuo ateh rumah— indak nyo pai-pai sajo. Ganti Murin namanya gadih—leh ketek masak pangaja—sajak paningga mandeh bapaknyo—tingga jo urang nan saparuik—dijagoi dunsanak kanduang—itulah niniak mamaknyo— bagala Datuak Tumangguang Putiah.
Sajak lah gadang si Ganti Murin—banyaklah urang nan manyuruah—mamintak si Ganti Murin—mamintak handak sumando—tapi dek Datuak Tumangguang Putiah—alun ado nan batarimo. Sabab inyo sadang bapikia juo—mancari urang ka sumando—ma
28
