Allah Taala menggarakkan—pintak nan sadang ka balaku— kahandak nan sadang ka buliah—lah datang urang nan katuju—iyo dek Datuak Tumangguang Putiah—anak rang Agam Padang Tarok—anak cucu si Murai Randin—kamanakan Alang Manjau Ari—nan bagala Makudum Sati. Sungguah di hati lah katuju—dirapekkan juo nan saparuik—niniak mamak sarato nan tuo-tuo—bakumpua di rumah gadang—sanan bakato Datuak Tumangguang Putiah, "Manolah niniak dangan mamak—sarato urang tuo-tuo—sado nan hadia di rumah gadang ko—nan ka tangah di hambo kini-tantangan si Ganti Murin—inyo kan iyo alah gadang—lah patuik inyo bakawan. Nan sakarang kini nangko—lah ado urang nan mamintak—handak manjadi rang sumando—anak rang Agam Padang Tarok—anak cucu si Murai Randin—kamanakan Alang Manjau Ari—nan bagala Makudum Sati. Kok kato alun bajawab—kok gayuang alun basambuik—batapo ka sipat kito—mak tantu kito bapambari."
Mandanga kato nan bak kian—manjawab saurang urang tuo—nan bagala Bagindo Kayo, "Manolah Datuak kato hambo—salorong kato Datuak nantun—itulah kato sabananyo—pihak kapado kamanakan kito—nan banamo si Ganti Murin—dari ketek inyo lah gadang—kok gadang lah patuik basuami. Maniliak kalo Datuak tadi—kini lah ado urang datang—handak ka jadi rang sumando—kami mamulangkan bakeh Datuak—patuik indaknyo urang nantun—kan jodoh si Ganti Murin. Sabab baalah dek baitu—tipak di badan diri kami—sado nan hadia kini nangko—tantangan rundingan itu—atau nan lain pado itu—di kami indak harubah. Datuak nan lah kami tinggikan sarantiang—nan lah kami dahulukan salangkah—pai ka bakeh batanyo—pulang ka bakeh babarito—kok lah katuju dek Datuak—kami pun satarimo pulo. Baapo nan elok kato Datuak—kami pun manuruik sajo—asa leh baban ka babao—musiki ka mano kato Datuak—manuruik sajo diri kami—ma nan katuju dek Datuak—itu katuju dek kami—usahlah Datuak panjang angan—
29
