Karambia sabatang tinggi
babuah sarangkai duo
Hukum adia adat badiri
pangka saiyo jo sakato
Birawari Datuak Tumangguang Putiah—lah lapeh inyo basumando—alah batambah sanang hatinyo—duduaklah inyo dangan tanang hukum adia bukan kapalang—musahua kian ku mari. Tahu di adat jo limbago—pandai di hereng dangan gendeng—lubuak aka rangkiang budi—kalau mauleh tak mangasan—mambuhua indak mambuku—paham dalam timbangan aluih. Kononlah inyo mamarentah-mahukum di dalam kampuang—indaklah ado nan maupek—sagalo anak buahnyo—laki-laki jo parampuan—abih mamuji ka sadonyo—bacampua takuik jo sayang—baitu urang ka sadonyo.
Kononlah Datuak Tumangguang Puliah—urang nan arih tahu bana—jokok tak pandai mamagang hulu-patah puntiang karih bamato. Panghulu nan ampek dikatahuinyo—aso "panghulu" dang namonyo—hujan paneh bakeh balinduang—kaduo "pangalah" dang namonyo—suko maracik anak buah—bak mangalah di batang aia—gadang ketek ikan nan dapek—katigo "pangaluah" dang namonyo—indak tantu di cupak gantang—kaampek "pangaliah" dang namonyo—jalan nan luruih suko maanjak. Pakaian panghulu banamo adat-basipat bana lautan alimu-panghulu cadiak adia manimbang—saba nan indak tatumbuak mamang—pandirian taguah tak baranjak—baalam laweh bapadang lapang. Panghulu kayo suko baragiah—kayonyo kayo di adat—malatakkan sasuatu di tampeknyo. Takilek sajo roman ikan—lah nyato ikan dalam aia—lah tantu jantan batinonyo—alun diliek alah paham—sarupo jimat dalam tubuah.
Ado kapado suatu hari—baliau Datuak Tumangguang Putiah tapikia di dalam hati—-maliek kampuang batambah rami—mancaliak rakyat batambah kambang—handak mancari kato mupakat-untuak mancari tanah lain—kan tampek urang bapindah.
Sabab baalah dek baitu—mancaliak contoh kanan sudah maliek tuah ka nan manang—dikana riwayaik niniak muyang—takalo maso dahulunyo—takalo sumua ka dikali-samaso nagari ka
32
