Suri Dirajo—basamo jo Datuak Bandaharo Kayo—dangan Datuak Maharajo Basa—handak mancari tampek pindah—supayo laweh juo alam nang ko.
Putuih mupakat maso nantun—bajalan Datuak Katumanggungan—mandaki Gunuang Marapi—manurun ka baliak gunuang-lah sampai inyo ka bawahnyo-basuo padang sabuah—padang nan elok untuak koto—babuek koto inyo di sanan—dinamoi Padang Bandaharo. Diparentahkan sabahagian anak buah—untuak malunyi kampuang nantun—ditanam pulo panghulunyo-bagala Datuak Bandaharo. Adapun kamudian daripado itu—lah kambang pulo urang di sanan—iyo di padang Bandaharo—pindah sabahagian ka tanah lain—tanah tunjuakkan Katumanggungan juo—lalu dinamai kampuang nantun-iyo jo kampuang Tanah Rajo—sabab tunjuakkan rajo Katumanggungan. Karono laweh tanah tunjuakkan—barulah sasak Tanah Rajo—pindah ka tanah tunjuakkan lain—walaupun sagan urang pindah—sabab salalu dilamun ampuah-akia kalaknyo pindah juo—karano tapaso mancari-mangko banamo nagari nantun—nagari Ampuah dangan Baso—sampai sakarang iko kini.
Pihak Parpatiah Nan Sabatang—bajalan pulo hanyo lai—sarato urang sapuluah urang—laki-laki jo parampuan—tadapek pulo satumpak tanah—leba nan bukan alang-alang—tanah nan data bak ditampo-lalu bakampuang inyo di sanan—dinamoi kampuang Dusun Tuo. Lah kambang pulo urang di situ—banyak pulo datang kudian-dikarajankan nan balimo—bagala Datuak Nan Balimo—itulah datuak nan Limo Kaum—limo kaum sanan bakambang. Mako di tampek karajan nantun—itulah medan nan bamulo—di dalam koto Limo Kaum—di dalam kampuang Dusun Tuo—dinamoi malah Tanah Karajan. Dek lamo bakalamoan—dibuek koto duo baleh—sabab urang lah kambang juo—jadi nagari Limo Kaum—Limo Kaum Duo Baleh Koto—puncaknyo Parpatiah Nan Sabatang. Babaliak Parpatiah Nan Sabatang—iyo ka dalam Pariangan-dipindahkan pulo tujuah kaluarga—ka satumpak tanah nan manjorok—dibuek kampuang babalik—dinamoi pulo Tanjuang Balik. Antah barapo kalamonyo—mangiang sungai di mudiak—iyo di mudiak Tanjuang Balik—dek lah pindah pulo urang ka sanan—iyo ka arah
34
