sungai nan mangiang—babuek kampuang pulo di situ—dinamoi
Sungai Nan Mangiang—kudian disabuik Sungayang sajo. Baru lah rami kaduonyo—Tanjuang Balik jo Sungayang-itulah namo sampai kini—namo nan tidak barubah-ubah. Mako ditanam pulo panghulu batujuah urang nan mulo-mulo datang ka nagari Sungayang nantun—bagala Datuak nan Batujuah—dalam nagari Tanjuang Sungayang.
Kononlah Datuak Sari Maharajo Nan Banago-nago—bajalan ka baruah Pariangan—dialahkannyo rimbo sakampuang—manbuek kampuang pulo di sanan—dinamoi kampuang Sialahan—ado nan taruih ka hilianyo—dinamoinyo kampuang Koto Tuo.
Sadanglah Cati Bilang Pandai—bapak Datuak Parpatiah Nan Sabatang—bajalan pulo kian ku mari—mancari tampek urang ka pindah—nak leba juo alam nangko. Dek lamo bakalamoan—lah banyak tanah nan dapek—sabab lauik manyentak juo—Pulau Paco batambah laweh. Kononlah Cati Bilang Pandai—dijapuik urang ka Sungai Tarab—sarato ka Limo Kaum—sarato Tanjuang Sungayang. Dibagi-bagi urang nantun—di ma nan ado tanah elok—disuruah hunyi ka samonyo—mako tasabuik kamudian urang nan asa dari tigo nagari tu—ado juo dari Pariangan—ado juo dari Koto Tuo. Mako sananglah hati Datuak nan batigo—sarato Cati Bilang Pandai-lah banyak nagari nan bahunyi—hampia batunggu ka sadonyo—lalulah sibuak dek karajo—manimbang buruak dangan baiak—mancari alua dangan patuik—nan ka pamaliharo urang banyak—supayo salamaik alam nangko.
Kamudian daripada itu—kononlah datuak nan batigo—Katumanggungan dan Parapatiah—sarato Sari Maharajo—basamo Cati Bilang Pandai—mandaki Gunuang Marapi kaampeknyo—sampai bana ka puncaknyo—lalu mamandang kiri-kanan—maliek jauah jo ampiang—pandang jauah balayangkan—pandang dakek hatukiakkan—nampaklah jurai tigo jurai—sajurai hadok ka Tanah Data—sajurai hadok ka Lubuak Agam—sajurai hadok ka Limo Puluah. Dek lauik basentak turun—dek Pulau Paco batambah leba—maliek banyak tanah nan kosong—nan balun dihunyi urang—satantangan nan tigo jurai mantun—lalu mupakat katigonyo—sarato Cati Bilang Pandai—handak bajalan mamareso—tanah nan tigo jurai nantun.
35
