tagak saurang-urang tuo-bagala Datuak Majo Palimo-inyo batanyo maso itu-kapado rombongan nan baru tibo, "Manolah urang nan banyak nangko-dari mano handak ka mano-mangko sarupo damikian-tolong kabakan bakeh kami-nak samo sanang paratian."
Mandanga tanyo nan bak kian-lalu manjawab malah dubalang-dubalang Rajo Kinayan, "Manolah Datuak nan batanyo-adapun kami nan datang nangko-iyolah datang dari rantau-rantau banamo VII Koto-handak pai ka IV Koto-iyo ka Canduang Koto Laweh-Koto Laweh Pandam Sikek-mukasuik maliek pakuburan-pakuburan niniak Tumangguang Putiah-itu nan niat sangajo kami."
Mandanga jawab dubalang nantun-kononlah Datuak Majo Palimo-sanan bakato pulo inyo, "Manolah Tuan nan banyak nangko-mano inyo manti dubalang-mano inyo Rajo Kinayan-iyolah pancang lah tacabuik-Surambi di mano tampek duduaknyo-Janjang mano tampek naiak-di mano Gantiang Parambahan-adokoh datang basamo-samo."
Mandanga rundiang nan taunjuak-kato nan dari datuak iko-indak disangko-sangko-manjawab pulo malah dubalang, "Adapun kami ka mari nangko-kami nan indak singgah manyinggahi-takana di kami sajo-dari Ampulu VII Koto."
Birawari Datuak Majo Palimo-orang jauhari bijaksano-tahu di hereng dangan gendeng-alun bakilek lah bakalam-sanan bakato hanyo lai, "Jokok pintu ka dibukak-ataupun tutuik ka basingkok-adokan janjang jo surambinyo-sarato Gantiang Parambahan.
Satantangan niniak Tumangguang Putiah-makam nan tidak di VI Koto-tapi kuburan baliau nantun-iyolah di IV Koto-bakubua di Koto Gadang-kan iyo di Balai Gadang-kubua baparik kiri kanan, Sungguah pun baitu bana-dek karano hari lah patang juo-marilah kito ka dangau buruak-buliah bacurai jo bapapa-mak jalch duduak masaalahnyo."
Kononlah Rajo Kinayan-sarato dubalang jo pangiriang-jatuah tamanuang mangiroi-mandanga nundiang Datuak Majo Palimo. Sabaklah mato Rajo Kinayan-sarato dubalang jo pangiriang-nan bak papatah urang tuo-malu batanyo sasek di jalan-sagan bagalah hanyuik sarantau-disangko murah manggalam ai-kurang aru
78
