Hinggo iko kaba ditulih
tangan panek jari lah lamah
Dawat kariang karateh abih
Tumangguang Putioh kaba lah sudah
Tumangguang Putiah namonyo niniak
Gunti Murin namo dunsanak
Kaba ditulih tambo dicaliak
supayo nak tahu urang nan banyak
Niniak nan turun ka IV Roto
mancancang lateh di Koto Gadang
Mukasuik dikarang kaba nangko
supayo sajarah usahnyo hilang
Di Ampalu managakkan pancung
Ampalu nun VII Koto
Kok ado tasalah atau takurang
tolong butuakan di nan basamo
V Koto Gantiang Parambahan
rambahan Tumangguang Sali
Tambo dibilang dipabincangkan
angkatan mudo handaknyo namuah manyalidiaki
IX Koto VI Lingkuang
Koto Marapak Pakandangan
Kok singkek tolonglah sambuang
kok panjang tolong karekkan
Lah tamat Kaba nan lahia
nan tasimpan kok banyak juo
Nak jan binaso papan dek ukia
ampun jo maaf untuak palukihnyo
81
