I. PULANG MARANTAU
Sumarak gaduang Bukittinggi
jam gadang jo kabun bungo
Satu Rabaa raminyo balao
Untuak parintang-rintang hati
kaba diulang-ulang pulo
kareno lah lamo tabangkalai
Limo Koto jo Saruaso
galah nan usah disandakan
latakkan ka rumpun dama
Jokok kato kurang mardeso
himbo nan usah digalakan
tolongah asak ke nan bana
Nyanyi talereng jadi kuba―kaba curito urang kini―kok untuang jadi palajaran―dibukak kulik ambiaklah isi. Takalo mulo-mulonyo―takalo maso kutiko nantun―hari nan sadang barembang patang―paneh manyirah paneh mambang―antah bidodari nan sadang mundi―baitu kato rang tuo-tuo.
Kan iyo Siti Fatimah―anak dek mandeh Siti Jainab―urang Sikumbang, kampuang Dalam―elen di ranah Subarang―dalam nagari Luhak Agam. Kan iyo Siti Fatimah—pulang di lubuak maambiak aia―dipikua parian di bahu―batikuluak jo anduak gadang―abuak balapiah di kapalo-abuak nan panjang singgan batih―anak rancak putiah kuniang―bajalan maadok pulang―hampia ka tibo di halaman.
Pado maso kutiko nantun―mandeh kanduang datang manyonsong―bakato mandeh Siti Jainab—bakato nan sambia galak sanyum, “Anak kanduang Siti Fatimah―si Sutan iyo lah pulang―baru ka tibo sabanta nangko.”
Kununlah Siti Fatimah―mandanga suami pulang marantau―baminyak muko kasukoan―sajuak rasonyo paratian-kato nan in―
85
