pajalanan, indak tontujalan nan di tuju. Tapi samantang pun baitu dituruik sado nan pasa, ditompuah sado nan golong. Dek diri Bujang Juaro, lah sabonta nyo bajalan, lah tampak dangau sabuah, dangau tu barasok juo, lalu dituruk ka kian.
Dangau takah lai baurang, dangau lai takah batunggui. Duo bonta nyo bajalan, lah tibo di tapi dangau, mahimbau tu nan jadi.
"O, Datuak rang di dangau, lai koh Datuak di rumah, lai koh dangau bahunyi. O, Tuak babunyilah Datuak, lai koh Datuak di dangau," katonyo Bujang Juaro.
Baru tadonga andai co itu, manjawek urang dangau, "O, Buyuang anak urang lalu, aluran di badan hambo, iyo hambo urang dangau, dangau lai bahunyi, buyuang naiaklah ka dangau," katonyo urang dangau.
Mandanga suaro tu, baru tahu Bujang Juaro, sarato Sutan Lembang Alam, baso dangau lai bahunyi. Lah tibo di ateh dangau, basalam inyo sakali, lalu duduak basimpuah. Lah baandai-andai juo, lah barundiang-rundiang kaji, di ateh dangau godang tu. Lah lamo antaronyo, tibo sudi jo siasek, datang usua jo pareso, dek diri urang dangau tu.
"O, Buyuang nan baru datang, anak datang dari mano, dimano korong kampuang ang, di mano dusun jo nagori. Baapo datang ka siko, awak sajombang sarancak ko. Manga ditampuah rimbo dalam, manga disawang rimbo labek, apo sobab karononyo, apo asa usuanyo, cubo caritokan lah kini, nak sonang di dalam hati, nak sunyi di kiro-kiro," katonyo urang dangau tu.
Manjawek Bujang Juaro, "O Tuak janyo hambo, kok itu Datuak tanyokan, aluran diri badan kami. mulo ka sampai ka siko, awa ka sampai ka mari, indaklah kami sangajo. Tapi baalah mangatokannyo, lah garak dari Allah, lah tasurek sajak dahulu, sajak di rahim bundo kanduang, kini untuang mandapati. Dongakan dek Datuak, nak sonang di dalam hati, nak sunyi di badan diri Datuak. Aluran badan kami nangko, kami bukan urang siko, kami nak rang jauah bona, kami nak rang Hindustan. Mulo dek sampai ka mari, awa dek sampai ku siko, lah dibao paruntuangan, lah dibao dek bagian, lah tarogak dek takadia, indak dapek nak kami bantah, tak buliah lai kami lawan. Lah tibo kami di siko, di muko diri Datuak ko. Tapi samantang pun baitu, kami nak batanyo pulo, adok ka diri Datuak ko. Datuak nak rang mano, di mano koroang kampuang, di manokoh dusun jo nagori Datuak,
89
