Anak kanduang Kambang Malati
dangakan malah den katokan
tantangan diri kau Kambang
anak surang tongga babeleang
si tongga indak badansanak
Ado papatah mangatokan
rancak lataknyo rumah gadang
kok ado alang jo rintangan
jo sia anak ka baio
Lai bana dansanak jauah
dek pitih makonyo suko
dek ameh makonyo sayang
dek tulang kuek makonyo ngamuah
Ado ibaraek mangatokan
babunyi sarine di jam gadang
babunyi tando pukua satu
bamamak ka mamak urang
tak dapek bakeh mangadu
Tapi sungguah pun baitu
kok pandai Kambang baparak
tanamlah labu jo pario
kok pandai Kambang bamamak
mamak urang jadi mamak kito
Kok tingga di korong kampuang
mauni dusun jo nagari
ka bukik samo mandaki, Nak
ka lurah samo manurun
nan barek samo dipikua
nan ringan samo dijinjiang
nan tuo kito muliakan
nan kaciak kito kasiahi
samo gadang lawan baio
usah basombong-sombong awak
Halaman:Kaba Minangkabau 1.pdf/120
↓Laman ko alah sah
