Halaman:Kaba Minangkabau 1.pdf/121

jan basipaik tinggi hati
dek kayo urang tak malu, Nak
dek bagak urang tak takuik
dek budi urang nan malu.

Ado papatah mangatokan
pisang ameh bao balaia
pisang lidi dibao mandi
utang ameh buliah dibaia
utang budi dibao mati

Usah manuhuak kawan sairiang
mangguntiang dalam lipatan
mamapeh ikan di balango
kanalah paham ka tagadai

Nan labiah bana den risaukan
awak lah nyato anak gadih
panagak di simpang labuah
panagun di tapi jalan
caliak bak raso ka malawan
pandang bak raso rang barani
di awak sagalo elok
di urang kurang ka sadonyo

Banyak den liek gadih kini
najak rumah turun rumah
gilo bagunjiang jo maota
io mambincangkan suami awak
nan di awak sagalo elok
di urang kurang ka sadonyo
banyak kecek banyak nan sasek, Nak
banyak kato banyak nan salah
itu nan rumik pado ambo

Dangakan sabuah lai
liek di Anak maso kini
jalan dialiah urang lalu
cupak dipapek urang manggaleh
liek malah di pasa rami