Rang sayang arif dan jombang
awak elok baso katuju
lagi paramah budi pulo
kalau dirantang namuah panjang
elok dipunta nak nyo singkek
ambiak sakadar nan paralu
lah jadi sahinggo itu
jawab sugiro kato ambo
Kambang Malati : Ayah kanduang usahlah rusuah
kito nan alah badangaran
nasihaik diganggam taguah
sesaat indak den lupokan
sabarih indak ka lupo, Ayah
alah ka sanang hati Ayah
Bidurai Sati: Kalau baitu kato anak
sananglah rasonyo hati ambo
tinggallah Anak di rumah
ambo bajalan sakutiko
Lareh Situjuah: Pono Jabok urang nan bijak
tampuak tangkai Situjuah Gadang
Pono ka mari malah tagak
ado parentah nan lah datang
Pono Jabok: Ampuni ambo Inyiak Lareh
disusun sapuluah jari
Inyiak panggia denai lah tibo
apo niatan dalam ati
Tasirok darah di dado Inyiak
tapacak paluah di kaniang
curai papahkan pado denai, Nyiak
nak sanang dalam hati
sunyi di dalam kiro-kiro.
Lareh Situjuah: Pono Jabok dangakan kato
dangakan bana sungguh-sungguah
113
