sanang rasono dalam hati
paham nan indak ka batuka
Tinggalah Datuak nan di rumah
ambo bajalan hanyo lai
samantaro ari alun tinggi
ambo pai malah kini
Kaba baraliah hanyo lai
io kapado Datuak Palo
mamintak izin ka amai Tati
lalu barundiang babicaro
0, Tati urang nan bijak
pamenan kampuang jo ilaman
Diak oi, kamari malah tagak
ado sabanta nak denai katokan
Diak kanduang urang babudi
pamenan kampuang jo ilaman
niaik mukasuik dalam ati
kinilah baru disampaikan
Ka sungai ka simpang Lurah
baolah timbo jo parian
o, Tati janji lah sudah
garak lah tibo di bagian
Saidi banamo Malin Ameh
barumah di pakan Baso
O, Tati ajanlah cameh
tantangan kato ambo iko
Dangakan bana nyato-nyato
kato nan indak dipapanjang
siriahlah datang pado ambo
dari kampuang Padang Ambacang
137
