Elok babaliak ka Lawang Kuniang, elok babaliak dagang ka surau, alah sarantang-rantang bajalan, cukuik lah yo pajalanan. Alah tibo di Lawang Kuniang, lah bangih Tan Iman Mudo, "Cilako bana waang nyo Jumbang, lah malang bana waang nyo Jumbang, sa- tangah dagang mintak sidakah, bareh bakaruang pulang ka surau, satangah dagang mintak sidakah Jumbang, pitih babilang pulang ka surau. Iyo nyo waang mintak sidakah Jumbang, buntia balipek pulang ka surau."
Sadang manangih si Malin Jumbang, "Oh Guru juo janyo am- bo, lai ambo takiak aua badangkiang Guru, iyo marayok kumbang tibo, lai ambo caliak nagari ampiang Guru, babuni tidak surang juo. Batakiak juo aua badangkiang Guru, nan sambilan kumbang di jalan, ambo caliak juo nagari ampiang Guru, lah tigo bulan yo dek bajalan. Kini baitu lah dek Guru, lah tujuah tahun ambo di siko, banyak parasaian nan ambo tangguang, nan indak bausai lah ambo tangguang Guru, aja lah baa ambo mangaji, kok untuang lakeh kaji ambo lanca Guru, kok untuang lakeh Kuraan tamaik, gilo mangaji jo sumbayang Guru, jaan badampaik ambo samo gadang."
Jan lai si Jumbang ka diaja mangaji, babuni tidak Tan Iman Mudo. Sadang manangih lalu bakato, "A wai Guru Tan Iman Mu- do, barimbo juo daun kacang Guru, den bao guluang ka ujuang nyo, patuik bamanuang si anak dagang Guru, badan tasada di untuang nyo. Ajalah baa ambo mangaji Guru, kok untuang lakeh kaji ambo lanca, kok untuang lakeh Kuraan tamaik, Guru, gilo mangaji jo sumbayang."
Sampai lah hangih Tan Iman Mudo, "Dagang cilako malah ang Jumbang, dagang mularaik malah ang Jumbang, urang nan samo datang jo waang satangah urang jadi alim, satangah urang lah jadi tuangku, satangah urang lah jadi iman, satangah urang lah jadi katik. Sorang nyo waang alun mangaji Jumbang, dagang mularaik lah waang Jumbang.
"A wai dek Guru Tan Iman Mudo, dangakan bana ai Tuan Guru, urang nan samo datang jo amho, satangah urang lah guru tuo, satangah urang lah jadi alim, satangah urang lah jadi imam. Bana di hati kato Guru, ajalah baa ambo mangaji. Kok untuang lakeh kaji ambo lanca Guru, kancang lah baa Kuraan tamaik, gilo mangaji jo sumbayang, jan badampaik samo gadang."
"A wai di waang dagang, cilako, manolah waang dagang mi- sikin, kalau kan iyo ka mangaji, Jumbang, ambiak lah surek lah jo jalehan."
215
