ka limo Guru gantuang, Guru gantuang ka dalam rimbo, babaliak juo dagang ka surau Guru, tagah dek aja ka balun sampai, tagah dek gadang ka balun sudah Guru; niaik di rumah yo pai mangaji. Kini baitu malah dek Guru, lah tujuah tahun dagang di surau, alun pulang saulang juo Guru, balun ka kampuang sakali juo, kini nyo ambo taragak ka kampuang Guru, iyo taragak jo kampuang ambo, eten di Malayu, Gunuang Tigo, anak si kabau-kabau tinggi, anak s Tujuah Banda Dalam, Guru, nan di balik gunuang nan tigo. Iyo taragak di ayah kanduang, inyo banamo Bandaro Ijau Guru, ambo taragak jo mande ambo, liau banamo Kasua Tabantang Guru, ambo tacinto di adiak ambo, inyo banamo Malere Suni, Guru. La- peh dek Guru ambo ka pulang, lapeh dek Guru jo ati suci Guru, lapeh dek guru jo muko janiah."
Sanan manjawek Tan Iman Mudo, "A wai ang Jumbang Ma- lin Muhammad, pintak baraso lai ka buliah Jumbang, kandak ba- raso lai ka balaku, tapi den bari janji dahulu Jumbang, dicari da- hulu ari nan elok, pandang dahulu katiko nan baiak Jumbang, lauik sati rantau batuah." Bana di hati si Malin Jumbang, sanan taguah ati kan pulang, sanan taguah pikiran nak pulang.
Dibuek surek dek Tuan guru, surek palasu nan anyo karang, dangakan bana isinyo surek. Awai dek mandeh Kasua Tabantang, duo jo ayah Bandaro Ijau, lah malang bana Jumbang baladang.
Urang baladang dalimo tumbuah
Jumbang baladang capo nan tumbuah
Lah malang bana Jumbang badagang
Jumbang cilako nan tumbuah
Tidak mangaji yo jo sumbahyang, anyo badagak jo samo gadang, siang malapeh jo layang-layang, malam manjago kadai urang, sureknyo buek ka layang-layang, surek nyo buek karateh koa, ba- abih balanjo Jumbang mangaji, cilako bana pai badagang, tandeh harato jo pusako, kalaunyo pulang si Malin Jumbang ndeh, elok dibunuah nak nyo mati, elok dibuang nak nyo jauah, elok di- gantuang nak nyo tinggi, cilako bana pai mangaji.
Surek dikirim dek Iman Mudo, surek dibao balam tigo gayo, inggok lah surek di gunuang nan tigo, sadang sumbayang Bandaro Ijau, surek dikambang dek ayah kanduang, surek dibaco dek ayah kanduang. Baru dibaco surek nan datang, aia mato jatuah baurai,
225
