sampailah minun si Malin Jumbang, sampailah minum sampailah makan, makan sasuok lai duo suok, sadang makan lalu bakato, lalu bakato si Rahimah,
"Padi si puluik rimbun daun,
padi si arang nan daun mudo,
asa lai namuah Tuan yo minun,
bia lai namuah jo makan, bialah kito iyo sadaun."
"A wai di kau Siti Rahimah, cando babana pandangan urang, kau saurang nak urang rajo ambo saurang nak urang rimbo, kan baduo iyo sadaun bak bana pandangan urang."
Sampai iyo makan si Malin Jumbang, makan sasuok lah duo suok, cukuik katigo anyo baranti. Suatu lah sudah minun jo makan, rundiang nyo sabuik dek ayah Rahimah. Lalu bakato ayah Rahimah, "Mano nak kanduang si urang mudo, urang batanyo lai lapeh arak, urang barundiang sasudah makan, kini yo jawek yo tanyo ambo, ambo batanyo basiluruih sajo."
Lalu manjawek si urang mudo, "Mano lai Ayah iyo urang rajo, kini baitu lah dek Ayah, sabalun gayuang kan ambo sambuik, sabalun kato ka ambo jawek, barilah izin ambo daulu, sabab lah sudah iyo minun jo makan, mukasuik lah sampai diama lah pacah, manuruik adaik di Minangkabau, pai iyo nan jo rundiangan, iyo nak pulang iyo ka tangah padang, duduaknyo ambo nak maurak selo, tagak ambo maayun langkah, rilakan bana aia nan taminun, sukokan bana nasi nan tamakan, ambo nak baliak ka dalam rimbo, ambo nak baliak ka tangah rimbo, ambo yo lah lamo yo dalam rimbo, mako dimabuak yo parasaian."
Sanan manjawek ayah si Rahimah, "Kandak nan balun yo ka balaku, pintak nan balun yo kan dibari, tanyo nan balun yo kan dijawek, barek nan balun yo kan waang irik."
"Awai dek Ayah si rajo Makah, tanyo nan tidak yo kan ta- jawek, pareso nan tidak ka baawasi, ambo nak urang rimbo, anak bingkatak anak bingkatau, anak si ngiang-ngiang rimbo, kini manjawek yo kato rajo, elok babaliak ambo daulu."
Tangan dipacik dek ayah Rahimah, "Mano dek waang yo urang mudo, baitu adaik nan kito pakai, urang diupah dibari pitih, urang disarayo dibari nasi, pareso nan balun waang jawek, waang
241
