nan balun buliah pai dek ambo. Kini baitu dek urang mudo, waang di siko anyo daulu, anak den surang iyolah baduo, sikua jantan sikua batino. Waang indak buliah yo pai lai, waang di siko batahan dahulu, badan tapawuik nan indak baliak."
Sinan manjawek si urang mudo, "Jikalau ambo tak buliah pai, jikalau ambo tatap di siko, cando bak bana pandangan orang, ambo saurang urang mudo, anak bingkatak anak bingkatai, anak singiang-ngiang rimbo, ka diam pulo di rumah rajo, candolah bana pandangan urang."
Dalam baunyan baunyai juo Jumbang dipegang dek ayah Rahimah, Jumbang ditahan dek ayah Rahimah, suatu ditahan si Malin Jumbang, Jumbang lah diam di rumah rajo. Alah saari lak duo ari, alah sapakan lah duo pakan, alah sabulan lah duo bulan, lah tigo bulan Jumbang di sinan. Lalu batanyo dek ayah Rahi- mah, "Barilah luruih ambo batanyo, siapo namo urang mudo ai, di mano kampuang halaman, siapo ayah bundo kanduang Nak, bari yo luruih ambo batanyo."
"Mano jo Ayah Rajo Makah, kalau itu Ayah tanyokan, ambo banamo nak urang rimbo, anak bingkatak anak bingkatai, anak si ngiang-ngiang rimbo, diam ambo dalam kubangan, Ayah pun tidak mandeh pun tidak Ayah, ambolah lameh di dalam rimbo."
Heran tacangang ayah Rahimah, imbau nan indak basauti, kato nan indak bajawati. Sanan batanyo ayah Rahimah, "Mano Nak kanduang si jantuang hati, mano Nak kanduang si biran tu- lang, Nak, a wai Nak kanduang si urang mudo, anak den surang lah baduo, sikua jantan sikua batino, bari jo luruih ambo ba- tanyo, siapo namo buyuang kini ai, di mano kampung jo hila- man, siapo ayah bundo kanduang Nak, supayo nak sanang hati di dalam, supayo nak suni di kiro-kiro, barilah jaleh tanyo ambo."
Sinan manjawek si urang mudo, "Mano dek AyahRajo Makah, kalau nyo namo Ayah tanyokan, ambo banamo si Buyuang Rimbo, kalaunyo kampuang ambo Ayah tanyokan, indak jaleh jo nyo tahu, kalau nyo Ayah nan ditanyokan, Ayah, ayah kanduang tidak- lah tantu Ayah, ambolah lamo ka dalam rimbo, ambolah lameh urang tabuang Ayah, ambolah lamo di dalam rimbo."
Sanan manjawek ayah Rahimah, "Kalau yo baitu jawek ta- tanyo waang, waang nan indak buliah pai, waang di sikolah da- ulu."
"Kalau baitu kato Ayah, Yah, bana di dalam jo ati ambo, alah
242
