Mudo, ondeh bari luruih kami batanyo, kami batanyo luruih-luruih, kami batanyo elok-elok, apo sababnyo nan bak kian, tadanga tabuah nan babunyi, sinan babunyi tabuah larangan, dicecer cenang dek si pamanggia, pamanggia urang di nagari, pambaritau (dek) urang banyak manokoh musuah nan lah datang, mano panghulu gagah nian mano panghulu lancar hukum, antah dubalang gagah nian, ato kok rando dapek malu, banakan juo pado kami."
Mandanga kato nan bak kian, manjawab tuanku lah Rajo Mudo, "Jokok salorong lah tantang itu, Tuan tanyokan tantang lah diri ambo, bukan panghulu dek lancar hukum, bukan dubalang gagah nian, bukan rando dek dapek malu, sinan babunyi tabuah larangan, babunyi cenang dek si pamanggia, pamanggia urang di nagari."
Iyo tuanku Rajo Mudo, lalu bakato maso nantun, "Ondeh di Tuan kanduang denai, baiyo di niniak lah dangan mamak sarato pangulu jo andiko, ambo manyarah lah di Tuan kanduang. apo ko paguno lah di galanggang ato kok kayu nan kan dijapuik atoko buluah nan dijapuik paelo baletong di galanggang, di tampek urang ondeh batanak jo manggulai.” Lalu manjawab ondeh lah niniak dangan mamak, sarato pangulu jo andiko, "Jokok salorong tantang itu, indak ko bukan dek denai ambo, basi elok diringgiti, kurang elok dibari pakai, pucuak dicinto dek ulam datang, isuak dicinto kini datang, Allhamdulillah tarimo syukur."
Lorong di Tuanku Rajo Mudo lah mangirim surek ilia mudiak, mangirim surek kiri kanan mambari tau sutan-sutan, mambari taulah rajo-rajo, inyo kan mamancang di galanggang nan tujuah ari tujuah malam mancari jodoh Puti Jailan. Lorong di urang nan banyak tu lalu basigap hanyo lai. Alah salasat tantang itu, dimulai urang di galanggang, mulai galanggang yolah rami di maso nantun, datang urang nan indak putuih, sinan sapantun samuik nan bairiang, sapantun nan anai-anai bubuih, nan di lambah da tang mandaki, ondeh di bukik datang manurun, ondeh nan tuo datang batungkek, nan kaciak datang baambin, iyo nan lumpuah datang baasak, ondeh nan buto datang bairik, rami galanggang nan tabedo tido, bamain urang di galanggang nan satangah lah puta dadu, nan satangah urang lah manyabuang, bialah kariak ditarinyo tulak batundo di bulu ayam, siriah manjadi lah sarok balai.
41
