Baik pun di badan diri hambo, adok ka badan diri kau. Sosek kok lah banyak sosek, doso koklah bahimpok-himpok, bori mooh Nak badan hambo. Kok iyo di siko lai untuang kito, di siko lai tanah mamintak, di siko lai bagian tibo, lah joleh di untuang kito," katonyo si Sari Banun.
Tibo andai dek ayahnyo: "Diak kanduang si Sari Banun, baiak kau si Banilai;
Jan balado di tapian
disokah rang rimbo
Jan bakato damikian
hambo kan rang pahibo.
Nak kanduang si Sari Banilai, baiak kau si Sari Banun, lah lupo kau dek lamo, Jan ragu kau dek banyak, pituah nan dari rumah, pangaja ibu jo bapo, pituah guru di surau. Sajauah-jauah bajalan, salamo-lamo hiduk, kambali ka Tuhan juo. Tak diagak disingajo, tak díukua dipikiri, bia di lauk pun di darek, bia di hutan di mano sajo. Di mano untuang ka mati, malah nasib ka sudah, tak ado urang nan mahambek. Tapi kini baitulah juo, dangakan malah dek kau. Pihak di badan diri kito, manuruk pagangan ambo, kito lah lopeh dari sansaro, lah lopeh dari basakik. Lah manjalang paruntuangan, luh sampai di tanah topi, lah tibo kito di darek. Kok lai urang di siko, kok lai badusun banagori, kok lai bakorong kampuang, hambo jopuk kau babaliak," katonyo Maulana Karim.
Pado saat maso itu, dek diri si Sari Banun, "Tuan kanduang Maulana Karim, kok baitu nan di Tuan, jan lamo Tuan bajalan. Konalah antuang badan kami. Kok tibo angin koncang, kok datang juo galombang, kami balaia baduo sajo, nyato karam di tangah lauk," katonyo si Sari Banun.
Tibo andai dek ayahnyo, "Diak kanduang si Sari Banun, anak den si Sari Banilai, manyarah sajolah kapado untuang, pulangkan sajo ko takadia. Manuruk pandapek hambo, hambo tak lamo kalua, sasaat hambo bajalan, manantu-nantu arah, maagak- agak alua. Kok lai kito lah tatuju, tatuju ka korong kampuang. Kok lai baurang di siko, kok lai bakoto banagari, itu nan ka hambo tuju. Maluh tantu nagori ko, babaliak hambo ka mari,” katonyo Maulana Karim.
Pado saat maso itu, dek diri si Sari Banilai, sarato Puti Sari
74
