Ka balai anak rang Koto
pulang manjalang tangah hari
disandang kain bugih lamo
Awak sakik suntik lah tibo
injeksi namo dek rang kini
Pel Banduang ubek kapalo
Di gunuang panjang tangah sawah
di baliak sarai tigo batang
tenggeran buruang dayu-dayu
Lah sabulan sakik ateh rumah
tingga jangek pamaluik tulang
nyo imbau anak jo minantu
Kalikih di dalam parak
nyo juluak anak rang Koto
Si Sitin nak si kato awak
dek waang caro iko pulo
Dibali poan tigo elak
dibuek baju bantuak kini
dijaik anak rang subarang
Tak mungkin sakik ka cegak
antah co iko rang ka mati
pangama amak hilang-hilang
Bagaluang pakua dalam parak
digatia urang Tanjang Saba
Malang sampai aja amak
baio-io sae tingga nak oi
Kujarat di tapi rimbo
digatia anak rang pulau
adoh diambiak ka pamenan
Dek si As caro itu pulo
ka mari Itin pi marantau
wak inyo jan diduoan
Halaman:Kaba Minangkabau 2.pdf/148
↓Laman ko alah sah
