Di tabiang nak rang Koto
ka mudiak jalan simpang Lalang
Batigo maliang bakarajo
buduo tukang caliak urang
Kapeh di karek ateh munggu
digatia anak rang Jati
Padek pikiran samalam tu
nan ma kolah den lonceki
Ka balai anak rang pulau
ka pulang balilah kain
Elok kapalo rampok den cakau
pulang ka kampuang tak juo mungkin
Karatau madang di rimbo
dibaliak batang bungo culam
Maliang talengah tumik tibo
basosoh cakak di nan kalam
Dibali lauak kapeh-kapeh
dibali anak rang Jati
Makin bapaluah makin dareh
alah co cambuik lapeh kaki
Bandabuek jo Padang basi
ka pulang baolah rotan
Alah co cambuik lapeh kaki
balapia-lapia lakek tangan
Malereang tabang buruang pipik
nyo tangkok urang Gunuang Sariak
Duo saranjeang kanai tumik
sorang taraok dek kalatiak
Limau puruik di tapi jalan
dibaliak batang sadan-sadan
Kaki naiak kalatiak makan
ka tembok badan nyo andehan
Halaman:Kaba Minangkabau 2.pdf/161
↓Laman ko alah sah
