Ilang kapa ganti jo banci
ilang salibu baparo-paro
Ilang bapak buliah den ganti
ilang ibu tamaik bicaro."
Dek lamo bamanuang di tapi pintu, habih hari baganti hari, lah sampai hari tigo hari, indak ado dagang nan lalu. Bakato gadih samo sorang, "Pado den duduak ateh pintu, elok den turun ka ateh janjang, bagolai turun ka ateh janjang, bapantun juo baibaraik,
Rumah gadang sambilan ruang
salajang kudo balari
Tatumbuak di diri sorang
sapantun manantang langik tinggi
Tijak tinjauan rang di Kasai
paninjau biduak rang bilalu
Maimbau gadih sayuik sampai
ka bapasan dagang tak lalu."
Habih hari baganti hari, lah sampai hari tigo hari, lah cukuik hari anam hari, indak ado dagang nan lalu, bakato samo sorang, "Pado den duduak ateh janjang, elok den naiak ka ateh rumah." Marentaklah gadih ka ruang tangah, manggadabua ka biliak dalam, nyo ambiak hanta nan sakalang, cukuik jo kain kampuah dalam, hajalan ka ruang tangal, nyo lansuang ka ruang tapi, nyo kunci dari dalam, nyo baok tidua manilantang, nyo buang caliak ka bubuangan, nyo bilang kasau ciek-ciek, hati batambah mamang juo. Kok untuang Gadih Basanai, lah pasiak diri samo sorang, indak tantu siang jo malam, kok malam nyo sangko siang, kok siang nyo sangko malam, makan indak minum pun indak, nasi nyo makan raso kasiak, aia nyo minum raso duri, gilo maratok jo manangih. Bunyi ratok babuah-buah, bunyi tangih batalun-talun, bunyi ba siang rambuik abuak, bunyi manumbuak andam dado, pintu nyo saok kasadonyo.
Adolah dagang rang mularaik, tatapek ka rumah Gadih, tadanga buah ratok urang, humanuang tagak di halaman, tasabuik baibu indak babapak indak, namun gaek lah mati pulo. UntuangTemplat:Left
