sudah lapeh, bakato rang gaek dalam kabun, "Nak kanduang dagang nan lalu, kalau itu Nak nan ang tanyokan, kok Sutan Sabirullah nan disabuik, tatakok bana. Buyuang di nan iyo, ambo nan Sutan Sabirullah."
Manjawek dagang rang mularaik, "Iyo Angku nan bagala Sutan Sabirullah, hambo mambao pasan urang, iyo di korong Langang Sunyi. Takalo Mamak dulu ka bajalan, kan Mamak bakamanakan, banamo Gadih Basanai. Kok untuang Gadih Basanai, sudah mularaik kato urang, ibu indak babapak indak, namun gaek lah mati pulo, lah tingga kini samo sorang. Apo karajo sarsari, lah pasiak jo banta nan sakalang, gilo jo kain kampuah dalam, tak jaleh siang jo malam, kok malam nyo sangko siang, kok siang nyo sangko malam."
Dek hetong Sutan Sabirullah, mandanga barito nan bak kian, hati nan indak elok lai, bagageh naiak ka sari rumah, liau ambiak kain jo baju, sarato kain saruang salai, dibuek bungkusan ketek, ka pai ka kampuang Langang Sunyi, pai manjapuik Gadih Basanai.
Kok untuang mandeh Ali Amat, tampak sakileh dari pintu, bajalan liau ka tapi, mahimbau mandeh Ali Amat, "O, Tuan di den dek Tuan, naiaklah dulu gak sabanta."
Lah naiak liau ka sari rumah, sinan batanyo mandeh si Ali "Apo toh salah pado ambo. Salaruik salamo iko, indak Tuan tagageh turun,
Dahulu indak kambelu
kinilah capo salurahnyo
Dahulu indak macam itu
kinilah jauah barubahnyo."
Manjawab Sutan Sabirullah, "Bukan toh salah pado kau,
Tinggi saketek pasa Gampuang
sinan tarandah nagari Kambang
Sajak dapek pasan di kampuang
darah di dado tak namuah sanang.
Bukan salah dek pado kau, dangakan malah den katokan. Takalo dulu ka marantau, den ado kamanakan sorang, banamo GadihTemplat:Left
