Alang di bukik sudah mati
sipuluik balun tatugakan
Bukan kapalang hibo hati
sadang tarumik batinggakan.
Aceh nak parang jo Palupuah
parang jo anak rajo-rajo
Carai jo mandeh haram bagaduah
bak matohari hilang sanjo.
Iyo malam Mamak den pulang, mandapati rumah lah la-ngang, mandapati Mandeh tak di rumah, mandapati tanah tasirah.
Anak urang dari tapian
nyo pai ka tampek mandi
Alah sajak Mamak tinggakan
sampai mularaik badan gadih
Panggang simbubua tak batulang
antah kok pandan manuruti
Mandeh di kubua tak a pulang
antah kok badan manuruti.
Sinan manjawab mamak gadih, "O, Piak Gadih rang Basanai, jan kau Piak manangih juo, dangakan dek Gadih kato mamak.
Parapati tabang ka sawah
buruang celuik bajamua hari
Lah mati bakalang tanah
kito hiduik babilang hari.
Jo mandehkau indak dapek batamu muko, kini kok lai kain bundokau, sarato baju sasak badan, langkok jo galang jo subangnyo, cukuik jo unduang-unduang salai, bao ka mari Mamak liek.
Nak urang mudiak Aia Haji
si galabuak labek buahnyo
Bia tataruah dalam peti
ka lapuak juo kasudahannyo."
