Kato nan indak gadih jawek, gayuang nan indak gadih sambuik, bajalan gadih ka ruang tangah, manggadabua ka biliak dalam. Nyo ambiak peti bundo kanduang, dibao gadih ka tangah rumah. "O, Mamak . . . dangakan malah,
Rotan sajangko duo jangko
sajangko tingga di jambatan
iko kain si mandiang nangko
ka lapuak juo di lipatan
Bulek kamuniang buah nipah
kironyo ampek parasagi
Diliek lipek tak barubah.
den kambang indak elok lai
Kalua den urak tambun batu
salimbado banyak di dalam
Kalau den urak lipek baju
aia mato banyak di dalam."
Mandanga kato kamanakan, sabuah kato indak dijawek, manangih mamak mandangakan. "O, Piak Gadih Basanai, asaklah peti bundokau.”
Nyo asak peti bundo kanduang, bakato gadih bakeh mamak,
"Salusin ayam ka den bilang
sikua di dalam sangkak juo
Samusin mandehden hilang
rupo jo tampan tampak juo
Kapa di baliak pulau Pisang
badaga bunyi pangayuahnyo
Kalau den kana mandeh nan hilang
laruiklah hati badan hambo
Kalau den saka dulang-dulang
badaun talang tapi banda
Kalau den kana mandeh nan hilang
satahun parang indak sudah."
