Lalu manjawab mamak gadih, "O, Piak Gadih Basanai,
Biolah talinyo ampek
putih salai tinggalah tigo
Nan hilang indaklah ka dapek
elok kau cari ka gantinyo.”
Bakato Gadih Basanai,
"Bia sapuluah ka pangali
indak kasamo jo tambilang
tambilang elok matonyo
Bia sapuluah ka pangganti
indak kasamo jo nan hilang
kok nan hilang elok basonyo.
Kayu suluah karangnyo manggi
bakudo lalu ka Piaman
Kok tumbuah buliah den ganti
samo rupo balain roman
Tambilang tanti batanti
satanti ambiak panaruko
panaruko sawah rang Palangai
padi batambah gadang juo
Nan hilang buliah den ganti
den ganti lai ka taganti
den ganti indak ka sarupo
sarupo lai ka sarupo
sarupo indak saparangai
hati batambah mamang juo."
Hari batambah sanjo juo, sanjo bajawek dengan malam, kok untuang mamak si gadih, dipujuak juo Gadih Basanai, "O, Piak
Gadih Basanai, apo tenggang bicaro kau. Kau lah tingga samo-samo sorang, lah tingga jo rumah gadang, jo siapo lawan baiyo, tatumbuak di diri sorang. Kan Mamak jauah di rantau urang, diam di Koto Katinggian, kok den tinggakan kau sorang, tantu hati den indak sanang. Kini co itulah di gadih, barisuak pagi kito ba-
441
