Nan ka pakan ka Panjalinan
nyo tabang batang limau puruik
Tadanga kato dari junjuangan
Piah nyo bae galak sisuruik
Ramo-ramo tabang ka munggu
inggok di rantiang limau lunggo
disakah batang buah palo
Aji maaja maso itu
kok pueh maaja kaji ateh surau
ka bawah maaja silek pandai pulo
Ka parak ka pasa baru
baranti tantang sawah lurah
ari manjalang sanjo rayo
Dilatak Aji tantang itu
tacaliak Pak adiak nan tangah
bagala pulo lah Sutan Mudo
Ka parak nak ka rimbo rayo
baranti tantang tanjuang bingkuang
ari manjalang tangah ari
Pihak kapado Sutan Mudo
urang nan congkak dalam kampuang
acang-acang dalam nagari
Ka rimbo ka tapi parak
ari manjalang sanjo rayo
Karajo ka sawah ka ladang indak
rintang bauru-bauru sajo
Buruang alang tabang jo bondo
inggok di rantiang di tapi ladang
diseka dama jo kamuniang
Maklum awak anak rang kayo
sawah jo ladang tak babilang
padi nan usang alun abih
baru batimbun pulo
rintang jo reli patang pagi
Halaman:Kaba Minangkabau 2.pdf/20
↓Laman ko alah sah
