Salamo Ali di pasa rami, hati gadih tak elok lai, tiok hari ba- hati dandam, limo hari sasudah itu, gadih nan kurang makan lai, dari bamanuang ka bamanuang, rusuah mintuo mamandangi, sinan nyo imbau mamak gadih. "O,Tuan di den diTuan, apo teng- gang bicaro kito, kito basarang tuo juo, kalau mati, mati bak kini, tak ado panyambuik tuo kito. Karano gadih ko tadorong gadang, lah patuik diganggam urang surang, kok Ali Amat baitu pulo, lah patuik pulang ka rumahnyo. Kini baitu malah dek kito, kito kawinkan gadih jo Ali Amat. Kok sampai kawin jo Ali Amat, kok mati kito nan baduo, gadih ka ganti hambo, Ali ka ganti ba- dan Tuan, inyo kan baipa pabisan, sarikaik indak ka nyo agiah, saruang indak ka nyo balah, buntak nan indak ka nyo kapiang."
Manjawek ayah si Ali, "O, Diak kanduang dangakan malah, kalau hetongan kito baduo, mungkin sasuai sudah tantu, kito tanyo timba baliak."
Manjawek malah mintuo gadih, "Kini baitu malah dek Tuan, pailah Tuan ka pasa rami, pailah japuik si Ali Amat."
Kato sampai mamak lah turun, barangkek ka pasa rami, manjapuik Sutan Ali Amat. Paningga mamak pai ka pasa, bakato mintuo gadih, "O, Piak Gadih Basanai, apo tenggang bicaro kau, kami jo mamak kau lah gaek bana, kalau mati, mati bak kini, indak ado panyambuik tuo kami. Karano kau tadorong gadang, lah patuik diganggam urang sorang. Kok Ali Amat baitu pulo, lah patuik pulang ka rumahnyo. Kini baitu malah di Gadih, na- muah koh kau kawin jo Sutan. Kalau kawin kau jo inyo, kalau mati kami baduo, kau ka ganti tubuah mintuo. Ali Amat ka ganti mamak kau, kau kan sanak ipa pabisan, sarikaik tidak diagiah, saruang indak ka babalah, buntak nan indak ka bakapiang.
Tumbuah rumpuik tumbuah hilalang
daun nibuang di tapi banda
Nyawo kami lupuik tubuah pun hilang
buliah kau guluang pusako tingga."
Manjawek Gadih Basanai, "O, Mintuo dangakan malah, Ali den sangko kakak kanduang, mamak den sangko bapak kanduang, Mintuo den sangko mandeh kanduang. Kini ka kawin Gadih jo Ali, langik den jujuang nan lah runtuah, bumi den pijak nan lah taban.
454
