Indak ang danga gelek gadih, bukan to gelek di gadihnyo. Takalo induak jo bapaknyo iduik, gelek jo ibu bapaknyo, lah baranam tunangan gadih, lah anam tando ditarimonyo, lah tujuah jo tando Ali Amat, urang sapakaik kaanamnyo, Ali jo siapo isuak ka sapa- kaik. Kini baitu malah dek waang, balilah minyak gak saboto, nan sarato sikek jo camin, pailah batarak ka Gunuang Ledang, ang batarak tujuah hari. Kalaulah dapek minyak cinduang paramayo mintaklah janji sabulan ganok, pailah dulu ka tanah Pagai, katokan taniaik sajak ketek, pulang di Pagai kawin juo. Ado pelang ka di tompang, pelang banamo Lumuik Hijau," kato sampai, kawan bajalan.
Kok untuang si Ali Amat, mandanga kato kawan samo ga- dang, raso hati lah iyo pulo. Bajalan Ali ka Gunuang Ledang, lah nyo iliakan labuah nan panjang, bajalan Ali samo sorang. Dek lamo lambek dek bajalan, lah tibo di Gunuang Ledang, nyo daki bukik Gunuang Ledang. Patang bajawek dengan sanjo, sinan bakaua si Ali Amat. Nyo Baka kumanyan putiah, asok mandulang ka udaro. Lah nyo unjamkan lutuik nan duo, nyo susun jari nan sapuluah, nyo takuakan kapalo nan satu, lah sujuik Ali ka ka kabilaik, sinan bakaua si Ali Amat. "Barakaik Allah, waliullah, barakaik Makah Madinah, barakaik kiramaik Gunuang Ledang, bakeh ma- mintak nan ka buliah, bakeh bakaua rang nan banyak.
Batarak Ali di Gunuang Ledang, habih hari baganti hari, lah sampai hari tujuah hari. Kok untuang takadia Allah, kandak buliah pintak balaku, lah dapek minyak cinduang paramayo, bajalan Ali baliak pulang. Nyo turuni bukik Gunuang Ledang. Indak singgah Ali di pasa, taruih sajo babaliak pulang. Lah nyo. mudiakkan labuah nan panjang, dek lamo lambek dek bajalan, tibolah Ali tangah laman, naiak sakali ateh rumah. Sato tibo di ateh rumah, nyo kanakan janjang ka pagu, nyo gantuang minyak ka pagu, sarato sikek jo camin. Lah sudah minyak nyo gantuang- kan, nyo lah turun ka sari rumah, bajalan Ali ka ruang tangah, sinan mahimbau mandeh kanduang, "Nak kanduang si Ali Amat, dangakan malah kato mandeh kanduang,
