Lah balabuah pelang di Siberut, turunlah Ali dari pelang, duo jo ayah kanduang inyo, bapantun Ali baibaraik,
"Ilia ka cando ka ka balai
manjinjiang boto duo tigo
Ali bajalan di pasa Pagai
lenggang kok gadih tampak juo.
Ilia ka cando ka ka balai
ditanam talang di pamatang
Ali bajalan di Tanah Pagai
raso manuruik gadih di balakang."
Kok untuang si Ali Amat, bajalan lah inyo masuak lapau, duo jo ayah kanduang inyo. Sato tibo di dalam lapau, indak lalu aia nyo minun, hati Ali tak elok lai,
Balaia kapa ka Bangkahulu
sauah dibongka duo tigo
Dialiah kaba tantang itu
sungguah baraliah sinan juo.
Dialiah ka Gadih rang Basanai, sinan nyo mahimbau mintuonyo, “O,Mintuo, bari luruih Gadih batanyo, lai lah jadi udo ka Pagai."
Manjawek mintuo gadih, "O, Piak Gadih Basanai, kalau itu nan ditanyokan,
Kok balaia babelok belok
balabuah tantang nan tanang
Udo kau pai hati tak elok
kito nan tingga indak sanang."
Manjawek Gadih Basanai,
"Masaklah buah limau kapeh
sabuyun rampak ka bubungan
Patuik udo tu minta lapch
kok tampak pulo pagantuangan.
